سەرەدانا زانستی یا قوتابیێن کولیژا زانست پشکا زانستێن کومپیوتەری بۆ پێشانگەها نێفدەولەتی یا هایتێکس (HITEX)

د چوارچێوەی گرنگیدانا زانکویا دهوک کولیژا زانست ب لایەنێ پراکتیکی و گرێدانا وانەیێن تیۆری ب جیهانا راستی و پێشکەفتنێن سەردەم، ڕۆژا پێنجشەمبی رێکەفتی (8/10/2026) ، ژمارەکا قوتابیێن کولیژا زانست ل پشکا زانستێن کومپیوتەری ب سەرپەرشتیا (مامۆستا نێژین عبدالرزاق و مامۆستا شڤان قاسم) سەرەدانەکا مەیدانی و زانستی بۆ پێشانگەها نێفدەولەتی یا هایتێکس ل باژێرێ هەولێرێ ئەنجامدان.

ئارمانجا سەرەکی یا ڤێ سەرەدانێ ئەڤە بوو:

🔹 ئاشنابوون ب تەکنۆلۆژیایێن نوی: قوتابیان ژ نێزیک نوویترین بەرهەم و داهێنانێن کۆمپانیێن ناڤخۆیی و نێفدەولەتی د بوارێن ژیرییا دەستکرد (AI)، ئاسایشا سایبەری، سیستەمێن زانیاریان و پەرەپێدانا سۆفتوێران دا دیتن.

🔹 بەرفرەهکرنا ئاسۆیێ هزری و زانستی: دیتنا پرۆژە و بەرهەمێن سەردەم هاندرەکێ ب هێزە بۆ گەشەپێدانا شیانێن داهێنەرانە یێن قوتابیان و دروستکرنا دیدگایەکا رۆهن دەربارەی پاشەرۆژا بازاڕێ کاری.

🔹 دروستکرنا پرێن پەیوەندیێ: قوتابیان دەرفەت هەبوو گەنگەشێ دگەل شارەزا و داهێنەرێن بیاڤێ تەکنۆلۆژیایێ بکەن و ژ نێزیک شارەزای ئەزموونێن وان ببن.

ئەڤ جورە چالاکی و گەشتێن زانستی بەشەکن ژ بەرنامێ هاتیە دارشتن ژ لایێ زانکویا دهوک ڤە کو دهێتە پەیرەوکرن ژ لایێ کولیژا زانست و پشکا زانستێن کومپیوتەر بۆ پەرەپێدانا ئاستێ زانستی یێ قوتابیان و ئامادەکرنا وان وەک کادرێن ژێهاتی و خودان شیان بۆ بازارێ کاری و پاشەرۆژێ.