ژبەر چالاكیا قوتابیێن چاپتەرێ کیمیایییێ کۆلیژا زانست یێ زانكۆیا دهۆك، كو سەر ب كۆمەلا كیمیایی یا ئەمریكی(ACS)ڤە، قوتابیێن پشكدار د ڤی چاپتەری دا هاتنە خەلات كرن بۆ كار وچالاكیێن وان یێن زانستی بۆ سالا 2022-2023.

پشتی هەولەكا مەزن وچالاكبوونەكا دۆمدرێژ ژ لایێ قوتابیێن پشكا كیمیایێ ڤە ب سەرپەرشتیا د. سوهاد یاسین، مامۆستا پشكا كیمیا ل دەسپێكا مەها ئیلۆنا 2022، چاپتەرەكێ تایبەت ب قوتابیێن زانكۆیا دهۆك ڤە هاتە ڤەكرن د كۆمەلا كیمیایی یا ئەمریكی دا ب پشكداریكرنا 6 قوتابیان، لێ د نوكە دا30 قوتابی ئەندامن. و ئەڤ چاپتەرە وەك ئێكەم چاپتەر ل كوردستانێ و عیراقێ دهێتە هژمارتن.

د ڤی چاپتەری دا، یێ كو ب ناڤێ UOD-ACS International Studentهاتیە ڤەكرن، قوتابی بەردەوام پشكداریێ د چالاكیێن زانستی دا دكەن ب مەرەما چارەسەركرنا ئاریشێن جڤاكی، و نزیك بوون و پەیوەندیكرن دگەل قوتابێن نیڤدەولەتی یێن چاپتەرێن وەلاتێن دی. و ب شیوەیەكێ سالانە، راپۆرتێن چالاكیان دهێنە هنارتن ژ لایێ چاپتەرێ زانكۆیا دهۆك ڤە بۆ كۆمەلا ئەمریكی و ژ لایێ وێ ڤە چالاكی دهێنە هەلسەنگاندن؛ و ب ڤی شێوەی چاپتەرێ زانكۆیا دهۆك بۆ سالا 2022-2023 هاتە خەلاتكرن و رێز ل كارێن وێ هاتە گرتن.

ژ هەژی گۆتنێ یە كو قوتابیێن هەر زانكۆیەكێ دشێن ببنە ئەندام د كۆمەلا كیمیایی یا ئەمریكی دا یان ژی چاپتەرەكێ تایبەت ب خو ڤە ڤەكەن ب مەرجێ ئەنجامدانا چالاكیێن زانستی یێن كو پالپشتیا رۆلێ كیمیا و پالپشتیا جڤاكی دكەن. هەروەسا، چاپتەرێ زانكۆیا دهوك ئامادەییا خو دەردبریت بۆ هاریكاریكرنا هەر زانكۆیەكا حەزا ڤەكرنا چاپتەرەكی هەبیت. و تا نوكە، هاریكاریا قوتابیێن پشكا كیمیا ل زانكۆیا زاخۆ كریە دا كو چاپتەرەكێ تایبەت ڤەكەن.

سەبارەت ب كار و چالاكیێن چاپتەرێ زانكۆیا دهۆك ڤە بۆ سالا 2023-2024، راپۆرتا سالانە ژ لایێ قوتابێن چاپتەری ڤە هاتیە هنارتن بۆ كۆمەلا كیمیایی یا ئەمریكی ژ بۆ هەلسەنگاندنێ.

ل دویماهیێ ژى، ستاف و ئەندامێن چاپتەرى سوپاسیا سەرۆکێ زانکۆیێ د. داوود سلێمان ئەتروشى و د. محەمەد عەزیز راگرێ کۆلیژا زانست کر، ژ بەر پاپشتى و پشتەڤانیا وان یا بەردەوام ژبو چاپتەرێ کیمیایێ یێ کۆلیژا زانست ل زانکۆیا دهۆک.