دیتن

ئەڤ سەنتەرێ ڤەکۆلینێن زانستی (SRC) ل دەستپێکێ ل دویڤ بریارا وەزارەتا خواندنا بالا ژمارە (1/ن/165) ل رێکەفتی 17ێ ئۆکتۆبەرا 2006ێ هاتە دامەزراندن. ئەگەرێ دامەزراندنا وی ژی پێشخستنا ڤەکۆلینێن ئەکادیمی و زانستی بوو ل زانکۆیا دهۆک. وەک دەستپێک، بوارێ تەکنۆلۆژیاییا زیندوو (Biotechnology) هاتە هەلبژاردن و ئەڤ چەندە ژی ڤەدگەریا بۆ هەبوونا کادرەکێ پێشکەفتی یێ خودان شارەزاییەکا بلند. زێدەباری ڤێ چەندێ، ب پشتەڤانییا مەزن و تمام یا زانکۆیێ، شیان هاتنە دابینکرن بۆ دابینکرنا ئامیرێن تاقیگەهێ یێن بنەڕەتی و پێدڤی و ماددەیێن کیمیایی یێن پێدڤی بۆ دەستپێکرنا ڤەکۆلینان د ڤی بوارێ گرنگ دا.

تەکنۆلۆژیاییا زیندوو چەندین ئامرازێن زانستی ب خۆڤە دگریت کو دشێن د بوارێن جودا یێن چاندنێ، بەرهەمئینانا خوارنێ و چاڤدێریا تەندروستیێ دا بهێنە بجهئینان. ئەڤ پێناسەیە بوارەکێ بەرفرهێ تەکنۆلۆژی یێن جودا ب خۆڤە دگریت، بۆ نموونە: بکارئینانا نیشانەدەریێن DNA بۆ ئاشکەراکرنا جینێن دیارکری یان نەخۆشیێن بۆمەزانی (جینیتیکی)، کلۆنکرنا جینان و ڤەگوهاستنا وان، زۆربوونا رووەکی و ڤەگوهاستنا کۆرپەلەی ل دەف رووەکان ب رێکا تەکنیکێن چاندنا شانەیان. تەکنۆلۆژیاییا زیندوو د چەند سالێن بوری دا ل سەرانسەری جیهانێ ژ لایێ زانایان ڤە گرنگییەکا گەلەک پتر پێ هاتییە دان نە وەک جاران. ئەڤ چەندە ژی بۆ گەلەک ئەگەران دزەفریت، دبیت ئێک ژ گرنگترین ئەگەران ئەوە کو ژمارا ئاکنجیێن جیهانێ سالانە نێزیکی 80 ملیۆن کەسان زێدە دبیت و نێزیکی هەمی زێدەبوونا ئاکنجیان د وەڵاتێن پێشکەفتی دا نە. ژبەر کو رووبەرێ ئەردێ چاندنێ یێ سنووردارە، پێدڤییە زێدەبوونا رێژەیا خوارنێ بۆ تێرکرنا خەلکێ جیهانێ ب رێکا زێدەکرنا بەرهەمێ خوارنێ ل سەر هەر هێکتارەکێ ئەردی بیت.