زانستێ فیزیکێ هێزێن بنەڕەتی یێن گەردوونى دکۆلیت ژ بۆ تێگەهشتن ل سروشتێ پێلان، تەنۆلکان و پێکهاتەیا ماددەی. د فیزیکێ دا، ئەم یاسا و چەمکان ب کار دئینین بۆ شڕۆڤەکرنا دیاردەیێن جودا یێن فیزیکی.

ئارمانجا سەرەکی یا پشکا مە ب خۆڤە دگریت باشترکرنا بەردەوام یا کوالیتییا وانەگۆتنێ بۆ قوتابیێن خواندنا بەرایی و بالا و پەرەپێدانا ڤەکۆلینێن زانستی د بوارێن جودا یێن فیزیکێ دا. ئەم قوتابیێن خۆ ئامادە دکەین بۆ فێربوونا درێژخایەن و گۆتنا وانەیا فیزیکێ ل قوتابخانەیێن ناڤەندی و ئامادەیی. دەرچوویێن پشکا مە دێ شێن وانەیا فیزیکێ بێژن ب بکارئینانا رێکێن سەردەم یێن وانەگۆتنێ، و هەروەسا د ئامادەنە بۆ کارکرنێ د بوارێن پیشەسازی، حکومی و خواندنا بالا د تایبەتمەندیێن جودا یێن فیزیکێ دا.

خواندنا بەرایی

پشکا فیزیکێ پرۆگرامێ باوەرناما بەکالۆریۆسێ د فیزیکێ دا بۆ ماوێ چوار سالان ب دەواما تەمام پێشکێش دکەت. پرۆگرام ب رەنگەکێ هاتییە داڕێژتن کو نێزیکی هەمی قوتابیان هەمان وانەیان د ماوێ هەر چوار سالێن خواندنێ دا وەردگرن.

خواندنا بالا

پشک پرۆگرامێن خواندنا بالا پێشکێش دکەت: ماستەر (دوو سال) و دکتۆرا (سێ سال) ب هەلبژاردنێن جودا یێن تایبەتمەندیێ. وانەیێن قوتابیێن ماستەرێ پێکهاتینە ژ کۆمەکا بابەتێن بنەڕەتی و تایبەتمەند. بابەتێن تایبەتمەند ب توندی گرێدایی ئارەزوویێن ڤەکۆلینێ نە، و ب ڤێ چەندێ ژی گرێدایی بابەتێن نامەیێن ماستەرێ نە. بۆ قوتابیێن دکتۆرایێ ژی، هەمی وانە ب توندی گرێدایی بابەتێن تێزێن وان نە.

بوارێن ڤەکۆلینێ یێن پشکێ:

1. فیزیکا نانۆ (Nano Physics)
2. فیزیکا بارێ رەق (Solid State Physics)
3. فیزیکا تیۆری (Theoretical Physics)
4. بایۆفیزیک (Biophysics)
5. فیزیکا پلازما (Plasma Physics)
6. پرۆسێسکرنا وێنان / چارەسەرکرنا وێنان (Image Processing)
7. زانستێ ماددەی (Material Science)
8. فیزیکا نیڤ گەیەنەران (Semiconductor Physics)